सुरुङ्गा (झापा) १८ माघ । राष्ट्रिय वाणिज्य बैंक बिर्तामोड शाखाले घैलाडुब्बामा शाखारहित बैंकिङ सेवा सुरु गर्ने भएको छ ।
बिर्तामोड नगरपालिकाबाट १५ किलोमिटर दक्षिणमा पर्ने घैलाडुब्बा बजारमा यो सेवा सुरु गर्न लागिएको हो । बैंकका शाखा प्रमुख किशोर अधिकारीका अनुसार सेवा सुरु भएसँगै जिल्लाका दक्षिणी क्षेत्रका डाँगीबारी, चकचकी, राजगढ, घेराबारीलगायत गाविसका सेवाग्रही लाभान्वित हुनेछन् ।
शाखारहित बैंकिङ सेवा गर्न घैलाडुब्बामा सम्पूर्ण तयारी पूरा भएको बैंकले जनाएको छ । राष्ट्रिय वाणिज्य बैंकले अहिले देशभर ४० ठाउँमा शाखारहित बैंकिङ सेवा सुरु गरेको र अब एकैसाथ ३७ स्थानमा यस्तो सेवा सुरु गर्ने तयारी गरिरहेको बताइएको छ ।
बैंकको बिर्तामोड शाखाले चालू आव २०७२÷७३ को छ महिनामा रु छ करोड ३२ लाख ८२ हजार नाफा गरेको छ । बैंकले अघिल्लो आवको उक्त समयमा रु दुई करोड १९ लाख ५४ हजार मात्रै नाफा गरेको थियो । बैंकका शाखा प्रमुख अधिकारीले आव २०७१÷७२ मा रु पाँच करोड ९८ लाख ७७ हजार नाफा गरेको जानकारी दिनुभयो । रासस
0 comments:
Post a Comment