जन्माएकी छोरीले नै आमालाई अन्माइन्

सुरुङ्गा (झापा) ३ बैशाख । आमा वुवाले आफ्ना छोरा छोरीको विवाह गरिदिएको तपाई हामी सबैले देखेका छौं । तर, आफैंले जन्माएकी छोरीले आमालाई अन्माइन् भन्दा तपाईलाई पत्यार नलाग्न सक्छ ।
यो यथार्थ झापाको बिर्तामोड नगरपालिकाको  हो । बिर्तामोड नगरपालिका–७ बिर्तामोड निवासी ३७ वर्षीया अंम्विका कार्की शिवाकोटीको विवाह छोरी १८ वर्षीया अप्सना शिवाकोटीले गरिदिएकी हुन् । भारतको राजस्थानका प्रकाश राहुल खटवानीसंग अप्सनाले आमा अम्विकाको विवाह गरेर आज अन्माइदिएकी छन् । एकवर्ष अघि सामाजिक सञ्जाल फेसवुक मार्फत उनीहरुको चीनजान भएपछि उनीहरुको प्रेम झाङिगदै गएको थियो ।

 अप्सनाले आफ्नी आमा र प्रकाशबीचको प्रेम सम्वन्ध बढ्दै गएको थाहा पाएपछि सामाजिक परम्परा अनुसार आज झापाको शनिअर्नुन नगरपालिकामा रहेको पूर्वको पशुपतिनाथका नामले परिचित अर्जुनधारा जलेश्वरधाममा  आमाको विवाह गर्दै अन्माएकी हुन् ।  धाम परिसरमा अप्सनाले हिन्दू संस्कार अनुसार नै आमा अम्विका र प्रकाशबीचमा विवाह गराएपछि हेर्नेको घुँइचो लाग्यो ।
सामाजिक संघ संस्थामा सक्रिय अम्विका अहिले वीरता लेडी जेसीज बिर्तामोड, गोदावारी समाज लगायत थुप्रै संघ संस्थामा आवद्ध छिन् । सामाजिक क्षेत्रकी अगुवा अम्विकाको विवाह छोरीले गर्दैछिन भन्ने सुनेर धाम परिसरमा धेरै स्थानीयवासीको उपस्थिति थियो । आफ्नै विवाह गर्ने उमेरमा किन गरिन् त आमाको विवाह अप्सनाले ? धेरै जनाको प्रश्नको सहजै हाँसीहाँसी उत्तर दिदै अप्सनाले भनिन् –  आमालाई गाह्रो नहोस् भनेर मैले आमाको विवाह गरिदिएकी हुँ ।
अंम्विकाको विवाह  २०५३ सालमा बिर्तामोड निवासी खगेन्द्र शिवाकोटीसंग भएको थियो । तर, उनीहरुको दाम्पत्य जीवन धेरैदिन टिक्न सकेन । २०६७ सालमा खगेन्द्रको आफ्नै घरको छतबाट झरेर दुखद् निधन भएपछि अम्विका र अप्सना मात्र घरमा बस्तै आएका थिए ।
अक्थ्थोलोजी (नेत्र रोग विशेषज्ञ) अध्ययनको सिलसिलामा अप्सना पनि भारतको वेङ्लोरमा अध्ययनका लागि गएपछि अम्विका पछिल्लो समय एक्लै बस्तै आएकी थिइन् । बिर्तामोडमा नै व्यवासय सञ्चालन गर्दै आउनुभएकी आमालाई म अध्ययन गर्न भारत गएपछि असहज नहोस् भनेर आमा र मेरो सल्लाहमा नै मैले उहाँको विवाह गरिदिएकी हुँ अप्सनाले भनिन् ।
आफ्नै जन्म दिने आमालाई अन्माउदै अप्सनाले भनिन्– ‘आमाको वाँकी जीवन हासीखुशी बितेको हेर्न चाहान्छु , आमालाई दाम्पत्य जीवनको शुभकामना ।’