हुलाकी मार्गको भद्रपुर – राजगढ सडक खण्डको शिलन्यास

सुरुङ्गा(झापा) २५ चैत ।   बहुप्रतिक्षित हुलाकी मार्गको भद्रपुर – राजगढ सडक खण्ड बन्ने पक्का भएको छ ।
१० वर्ष अघि शिलन्यास गरिएको उक्त सडक खण्डको आज पुनः शिलन्यास गरिएसंगै हुलाकी मार्ग बन्ने पक्का भएको हो ।  हुलाकी मार्ग आयोजन अन्र्तगत निर्माण हुन लागेको सो सडक खण्डको आज राप्रपा नेपालका महामन्त्री राजेन्द्र लिङ्देनले शिलन्यास गर्नुभयो ।
हुलाकी मार्ग पहिलो चरणमा २० किलोमिटर निर्माण सम्पन्न हुने भएको छ । उक्त सडक खण्डको शून्य किलोमिटर अर्थात जलथलको बडावारीमा आज  आयोजित कार्यक्रमका बीच पण्डितद्वय अर्जुन भट्टराई र कुश्माखर आचार्यले विधिवत रुपमा वेदका मन्त्र उच्चारण गरेपछि सडकको शिलन्यास गरिएको थियो ।
२०७५ साल साउन १२ गतेभित्र सडकको निर्माण कार्य सम्पन्न गर्ने सम्झौता भएको निर्माण कम्पनीका निर्माण व्यवसायी तेजकुमार कुरुङ्वाङ्गले बताउनुभयो । १३ प्रतिशत कर वाहेक उक्त सडक रु २६ करोड ४३ लाख रुपैयाँको लागतमा निर्माण हुन लागेको  आयोजनका इन्जिनियर उपेन्द्र दासले बताउनुभयो । उहाँका अनुसार हुलाकी राजमार्गको झापा खण्डमा पहिलो पटक सडक कालोपत्रे हुन लागेको हो । झापामा हुलाकी मार्ग अन्र्तगत  ५० किलोमिटर हुलाकी मार्ग पर्दछ । सो खण्डको २० किलोमिटर सडक तत्काल निर्माण हुने र सडकको चौडाई साढे १० मिटर भएपनि कालोपत्रे साढे पाँच मिटर मात्र हुने आयोजनाका इन्जिनियर दाशले बताउनुभयो ।
हुलाकी माग भारत सरकारको सहयोगमा निर्माण हुन लागेको बताइएको छ  । उक्त सडकको निर्माणको ठेक्का आशिष याक्थुम्वा जेवी फिदिम – १ पाँचथरले लिएको बताइएको छ ।
सडक निर्माणका लागि २०७२ साल माघ १३ गते नेपाल सरकार र निर्माण व्यवसायी कन्दङ्वाबीच सम्झौता भएको बताइएको छ  ।
सडक शिल्यास कार्यक्रममा बोल्दै राप्रपा नेपालका महामन्त्री लिङ्देनले सडक निर्माणका क्रममा सबैलाई सहयोग पु¥याइदिन आग्रह गर्नुभयो । उहाँले यो सडक पटक पटक निर्माण हुने भनिएपनि प्राविधिक कारणले निर्माण हुन नसकेको र यस पटक निर्माण कार्य सुरु भइसकेकाले सबैको सहयोग आबश्यक रहेको धारणा राख्नुभयो । निर्माण व्यवसायी कन्दङ्वाको अध्यक्षतामा भएको कार्यक्रमको सञ्चालन झरेन्द्र पराजुलीले गर्नुभएको थियो ।