सुरुङ्गा (झापा) ७ बैशाख । रु ११ अर्ब ८६ करोड रुपैयाँको लागतमा साहस उर्जा (प्रा.) लि.ले आफ्नो शतप्रतिशत लगानी रहने गरी सोलुखोला(दुधकोशी) जलविद्यूत आयोजना सञ्चालन गर्ने भएपछि झापासहित पूर्वी नेपालका नागरिक जलविद्युत आयोजनामा लगानी गर्न आकर्षित भएका छन् ।
हाइड्रो भेञ्चर (प्रा.)लि.द्वारा प्रवद्र्धित ८६ मेघावाटको सोलुखोला(दुधकोशी) जलविद्यूत सञ्चालन गरिने भएपछि यहाँका नागरिक आयोजनामा लगानी गर्न इच्छुक भएका हुन् । निजी क्षेत्रबाट बन्न लागेको नेपालकै सबैभन्दा ठूलो र तथ्यांक अनुसार उच्च प्रतिफल दिने आयोजनाको रुपमा पहिचान भएको साहस ऊर्जाका सञ्चालक सदस्य एवम् हाइड्रो भेञ्चरका अध्यक्ष मीनराज कँडेलका अनुसार ४ हजार जना भन्दा बढीले शेयर खरिद गरिसकेका छन् । त्यसमा अधिकांश पूर्वी नेपालका नागरिक रहेको बताइएको छ ।
झापाका मात्र ७ सय जना भन्दाबढी सर्वसाधारणले साहस ऊर्जाको हाइड्रो भेञ्चरद्वारा प्रवद्धित सोलु खोला जलविद्युत आयोजनामा लगानी गरेको साहसका सञ्चालक सदस्य महेन्द्रकुमार गिरीले जानकारी दिनुभयो ।
सहकारी संस्था, सहकारीकर्मी तथा अन्य सर्वसाधारणले शेयर खरिद गरिरहेको गिरीले बताउनुभयो ।
झापाको बिर्तामोड(चारपाने)स्थित सहारा नेपाल (साकोस)ले समेत उक्त हाइड्रोमा लगानी गरेको बुझिएको छ । कम लगानीमा उच्च प्रतिफल दिने अनुमान गरिएको उक्त आयोजनाको शेयर सदस्य बनेर लगानी गर्ने अन्तिम समयसीमा वैशाख मसान्त तोकिएको छ । सहारा नेपाल (साकोस)मा फारम भरेर शेयर रकम जम्मा गर्नेको चाप पनि बढेको पाइएको छ । सो अवधिमा साहस उर्जाले ३० प्रतिशत रकम जम्मा गर्नुपर्नेमा त्यो लगभग पूरा भइसकेको जनाइएको छ । ७० प्रतिशत लगानी बैंकले गर्नेछन् । त्यसका लागि जेठबाट सम्झौताको काम अघि बढ्ने सञ्चालक समितिले जनाएको छ ।
आयोजनाको मुख्य ड्याम(बाँध) सोलुखुम्बुको कांगेल र तिङ्ला गाविसकोबीचमा पर्ने सोलुखोलामा रहने बताइएको छ । त्यहाँबाट ४६ सय मिटर लामो टनेलमा छिराइएको पानी १६५५ मिटर लामो फलामे पाइप (पेनस्टोक) हुँदै सोलुखुम्बुकै पञ्चन गाविसमा बनाइने पावर हाउसमा खसाइने जनाइएको छ । त्यहाँ उत्पादित विद्युत सोलुकै तिङ्ला सवस्टेशन मार्फत राष्ट्रिय प्रशारण लाइनमा जोडिनेछ । पावर हाउसबाट तिङ्ला सवस्टेशनको दुरी १२ किलोमिटर मात्र रहेको छ ।
सन् २०२०को मार्चसम्ममा सोलुखोला जलविद्युत आयोजना निर्माण पूरा भई विद्युत उत्पादन शुरु गर्ने गरी साहस ऊर्जाले एक बर्षअघि नै सरकारसँग सम्झौता(पीपीए) गरिसकेको छ । तर त्यो भन्दा एक ÷डेढ बर्ष अगावै आयोजनाको निर्माण पूरा भई विद्युत उत्पादन हुने अध्यक्ष कँडेलले बताउनुभयो ।
अहिले बाटोको ट्रयाक खोल्ने, बाटो बनाउने लगायतका आधारभूत काम भइरहेको जनाइएको छ । असोजबाट काम दू्रत गतिमा अघि बढ्ने बताइएको छ । ०७० सालमा स्थापित साहस उर्जाले गुल्मीमा पाँच मेघावाटको विद्युत आयोजना निर्माण पूरा गरी एक बर्षदेखि सञ्चालनमा ल्याइसकेको छ । निजी क्षेत्रको सक्रियतामा सामुदायिक तथा सहकारी तहमा साझेदारी (पीपीसीपी) अवधारणा अन्तर्गत बजारमा छरिएर रहेको पूँजीलाई एकत्रित गरी जलविद्युत उत्पादनमा लगाउने ध्येयका साथ साहस उर्जाले काम गरिरहेको सञ्चालकको भनाइ छ ।
‘सोलुखोला(दुधकोशी) जलविद्युत आयोजना निजी क्षेत्रबाट बन्न लागेको नेपालकै सबैभन्दा ठूलो आयोजना भएकोले यो झापासहित पूर्वेली मात्र होइन आम नेपालीको गौरबको आयोजना हो’– साहसका सञ्चालक सदस्य महेन्द्रकुमार गिरीले भन्नुभयो – यसले लगानीकर्तालाई उच्च प्रतिफल त दिने नै छ, मुलुकलाई ऊर्जा संकट मुक्त गर्न ठूलो योगदान पु¥याउनेछ ।’
निजी, समुदाय र सहकारीको सहकार्यमा जलविद्युत परियाजनाको सञ्चालन र विकास गर्ने उद्देश्यले आफूहरुले काम गरिरहेको बताउँदै साहस उर्जा सञ्चालक समिति अध्यक्ष हिमप्रसाद पाठकले भन्नुभयो – ‘प्रतिफलको सुनिश्चितता गर्दै मुलुकको आर्थिक समृद्धिका लागि योगदान पु¥याउनेछौं ।’
राष्ट्रिय योजना आयोगका पूर्व सदस्य तथा पूर्व सांसद डा. डिल्लीराज खनाल र पूर्व अर्थसचिव रामेश्वर खनाल मुख्य सल्लाहकार रहेको साहस उर्जाको सञ्चालकमा पाठक, कँडेल र गिरी सहित परितोष पौड्याल, भोजबहादुर साह, मुक्तिराम पाण्डे र जिज्ञासा सुवेदी रहनुभएको छ ।
0 comments:
Post a Comment