मापसे’ गर्दा रु ८ लाख जरिवाना !

सुरुङ्गा (झापा) ८ असार ।  मादक पदार्थ सेवन गरेर सवारी चलाउने झापाका ७९३ सवारी चालक  कारवाहीमा परेका छन् ।

 जिल्ला ट्राफिक प्रहरी कार्यालय झापाका अनुसार चालू आर्थिक वर्षको  असार ६ गतेसम्ममा उनीहरु कारवाहीमा परेका हुन् । कारवाहीमा परेका सवारी चलकहरुबाट प्रहरीले रु ७ लाख ९३ हजार रुपैयाँ राजश्व संकलन गरेको जिल्ला ट्राफिक प्रहरी कार्यालय झापाका प्रहरी निरीक्षक ढुण्डीराज गिरीले जानकारी दिनुभयो । गत वैशाख महिना सम्ममा ६७९ जना, जेठमा ७६ र असारको ६ गते सम्ममा  ३८ जना कारवानहीमा परेको प्रहरी निरीक्षक गिरीले बताउनुभयो ।
अघिल्लो आर्थिक वर्षमा प्रहरीले ९०३ लाई कारवाही गरेको थियो । जसवाट ९ लाख ३ हजार  रुपैयाँ राजश्व संकलन भएको जिल्ला ट्राफिक प्रहरी कार्यालय झापाको तथ्याङ्कमा उल्लेख छ ।
मादक पदार्थ सेवन गरेर सवारी नचलाउन आग्रह गर्दै प्रहरीले सवारी चलाउदा सवारी दर्ता किताव र सवारी चालक अनुमति पत्र अनिर्वाय रुपमा बोक्न समेत आग्रह गरेको छ ।
जिल्ला ट्राफिक प्रहरी कार्यालय झापाका प्रहरी निरीक्षक गिरीले आज एक सूचना जारी गर्दै ट्राफिक नियम उल्लङ्घन गरे सवारी तथा यातायात व्यवस्था ऐन २०४९ को दफा १६० र १६४ बमोजिम कारवाही गर्ने बताउनुभएको छ ।