रगतको अभाव टार्न नेपाल रेडक्रस सोसाइटी सहित विभिन्न संघ–संस्थाले समय– समयमा रक्तदान कार्यक्रमको आयोजना गर्छन् । त्यसरी आयोजना गरिएको रक्तदान कार्यक्रममा अझैं पनि धेरै मानिस रक्तदान गर्न डराउँछन् ।
तर, झापाको बिर्तामोडका एक व्यक्ति त्यस्ता छन्– जसले अहिलेसम्म ५४ पटक रक्तदान गरिसकेका छन् । शनिअर्जुन–६ स्थानी घर भएका ओमप्रकाश लुइँटेल पेशाले व्यवसायी हुन् । उनले अहिलेसम्म ५४ पटक रक्तदान गरिसकेका छन् । २२ वर्षको उमेर हुँदादेखि रक्तदान गर्न शुरु गरेका उनी ४० वर्षको हुँदा सम्ममा ५४ पटक रक्तदान गरिसकेका हुन् । मानवको सर्वाेत्तम कार्य नै सेवा सम्झने उनी रक्तदानलाई नै प्रमुख ठान्छन् र निरन्तर रक्तदान कार्यक्रममा सहभागिता जनाइरहन्छन् । स्वास्थ्य शरीर रहुञ्जेल निरन्तर रक्तदान गरिरहने उनको लक्ष्य सयपटक रक्तदान गर्नु रहेको छ । लुइँटेलले २०५५ सालमा पहिलो पटक रक्तदान गरेका थिए । उनको रक्त समूह ओ पोजेटिभ हो । पहिलोपटक रक्तदान गर्दा आफू कमजोर भएका कारण अलिअलि रिंगटा लागेको सुनाउँदै उनले भने– ‘शरीर स्वास्थ्य राख्नु छ भने निरन्तर रक्तदान गरिरहनुपर्छ, अहिले म पूर्णरुपमा स्वस्थ छु ।’ रक्तदान गर्न मानसिक रुपमा त्यो वेला म तयार थिइन क्यारे त्यही भएर मलाई रिंगटा लागेको रहेछ विगत सम्झँदै उनले भने– ‘अहिले मेरो एक पाउण्ड व्लड ४ मिनेटमा तयार हुन्छ ।’ जतिधेरै रक्तदान ग¥यो उनी नै स्वास्थ्यलाई फाइदा पुग्दो रहेछ, म अहिले हट्टाकट्टा छु, अनि निरोगी पनि लुइँटेलले भने ।
तीन–तीन महिनाको अन्तरालमा रक्तदान गर्ने लुइँटेलले पछिल्लो समय २०६२ सालबाट निरन्तर रक्तदान गरिरहेका छन् । २०६२÷०६३ सालको जनआन्दोलनका समयमा झापामा रगतको धेरै अभाव भएको थियो । सो समयमा समेत उनले रक्तदान गरेर मृत्युको मुखमा पुगेकालाई नयाँ जीवन दिएका छन् । उनले अस्पतालमा रगत अभाव भएर मृत्युको मुखमा पुगेकालाई पनि रगत दिएर बचाएका छन् । नेपाल रेडक्रस सोसाइटीसँग समन्वय गरेर लुइँटेलले निरन्तर रक्तदान गर्न थालेपछि अहिले उनलाई रेडक्रसले मात्र होइन जसलाई रगत अभाव भएको हो उनीहरुका आफन्तलेसम्म सिँधै फोन गर्ने गरेका छन् । उनलाई सवैभन्दा बढी फोन जब सवारी दुर्घटना हुन्छ, त्यो समयमा आउने गरेको छ ।
रगत अभाव हुँदा नेपाल रेडक्रस सोसाइटी, अस्पताल र विरामीका आफन्तले पनि फोन गर्ने गरेको बताउँछन् उनी । पछिल्लो समय २०७२ साल असार २४ गते उनले एक सुत्केरीको जीवन बचाएको बताए । सुत्केरी महिलालाई ‘फ्रेस व्लड’ चाहिएको रहेछ कतै नपाएपछि मलाई वीएण्डसी हस्पिटल बिर्तामोडबाट फोन आयो मैले त्यो समय तुरुन्त ‘व्लड’ दिएर उनको ज्यान बचाए लुइँटेलले भने ।
झापाको बिर्तामोडमा नेपाल रेडक्रस सोसाइटीले सञ्चालनमा ल्याएको व्लड वैंक भवनको उद्घाटन हुँदा आयोजना गरिएको रक्तदान कार्यक्रममा आफूले एक महिना २९ दिनको अन्तरालमा पनि रक्तदान गरेको छु भने ।
निरन्तर रक्तदान गर्न रुची राख्ने उनको रक्तदान गरेको प्रमाण स्वरुप नेपाल रेडक्रस सोसाइटीले दिएको सानो कार्ड मात्रै छ । उनी जतिपटक रक्तदान गर्छन् त्यही कार्डमा रेडक्रसका कर्मचारीले विवरण भरेर हस्ताक्षर गरिदिन्छन् । रक्तदान गरेको प्रमाण उनीसँग त्यति मात्रै छ । त्यो भन्दा धेरै उनीसँग अरु केही प्रमाण छैन । समाजका लागि आफूले केही गर्न नसकेको बताउँदै लुइँटेलले भने– म पेशाले व्यवसायी हुँ, अरु समय व्यवसाय हेर्नु पर्ने हुन्छ कसैलाई रगत नपाएर आपत परे दौडिएर रगत दिन जान्छु ।’ समाजसेवामा रुची राख्ने उनी आफ्नो कार्यव्यस्तताले केही गर्न नपाएको बताउँदै उनी भन्छन् – म सजिलो बचत तथा ऋण सहकारी संस्थामा पनि आवद्ध छु । त्यही सहकारीबाट वार्षिक रुपमा आफ्नै अगुवाईमा रक्तदान कार्यक्रमको आयोजना गराउँछु । अरुलाई पनि रक्तदान गर्न प्रोत्साहन गर्ने उनी नेपाल रेडक्रस सोसाइटीसहित विभिन्न संघ–संस्थाले आयोजना गरेका कार्यक्रममा रक्तदान गर्न शुरुमा नै पुग्छन् । नेपाल रेडक्रस सोसाइटीको विशिष्ट सदस्य समेत रहेका उनी कसैलाई कुनै समूहको रगतको अभाव भएको सुने भने पनि आफैं रगत खोजी दिने काम गर्छन् । रक्तदान नै जीवन दान हो भन्ने मर्मलाई उनले राम्ररी बुझेका छन् । उनीसँग अरु–अरु रक्त समूहका रक्तदाता मानिसको सम्पर्क छ । जसलाई जुन व्लड चाहिएको हो तुरुन्त त्यसको जोहो गर्न उनलाई समय लाग्दैन । उनी चनाखो पनि छन्– नेगेटिभ व्लड ग्रुपसँग । त्यही भएर उनी सँधै डायरीमा त्यस्ता रक्तदाता व्यक्तिको सम्पर्क नम्बर लिएर हिंड्छन् । जस्तो नाम त्यस्तै काम बिर्तामोडका औषधि व्यवसायी रणदेव हजामले भने– उनी अत्यन्त समाजसेवी व्यक्ति हुन् । त्यस्ता मानिसको सँधै हामीले सम्मान गर्न जान्नुपर्छ । उनको नामको शुरुवात नै ओमबाट शुरु भएको र अन्त्य पनि प्रकाशमा पुगेर हुन्छ हजामले भने– ओमप्रकाशले अहिलसम्म रक्तदान गरेर धेरैको जीवनमा प्रकाश छरेका छन् ।
यता नेपाल रेडक्रस सोसाइटी उपशाखा बिर्तामोडका सभापति सजेश शिवाकोटीले यस्ता दातालाई सम्मान गर्नुपर्छ भने । उनले यस्ता दाताको सम्मान गर्नु पनि आफूहरुको प्रमुख दायित्व रहेको बताउँदै रक्तदाता दिवसका दिन लुइँटेलसहित दिपेश वैधलाई हामीले केही गर्ने सोच बनाएका छौं भने । समाजसेवामा अग्रपंक्तिमा रहेका लुइँटेल आफू मात्रै रक्तदान गर्दैनन् जुन संस्थामा आवद्ध छन् त्यही संस्थालाई रक्तदान गर्न लगाएर नेपाल रेडक्रस सोसाइटीलाई पनि महत्वपूर्ण सहयोग पु¥याएको शिवाकोटीले बताए । बिर्तामोडमा निर्माण भएको व्लड वैंक स्थापना गर्न पनि महत्वपूर्ण सहयोग लुइँटेलको छ भन्दै भने– लुइँटेल जस्तै रक्तदान गरिरहने बिर्तामोडका दिपेश वैध र सन्तोष अग्रवाल पनि अग्रपंक्तिमा हुनुहुन्छ । उहाँहरुले पनि ५० पटक भन्दामाथि रक्तदान गरेको मैले सुनेको छु शिवाकोटीले भने । रक्तदाताको पहिचान खुल्ने गरी हामी अब तथ्याङ्क संकलन गरेर अघि बढ्ने रेडक्रसको भावी योजना रहेको शिवकोटीले बताए ।
