सुरुङ्गा (झापा) ११ माघ । नागरिक समाजले दवाव दिएपछि मृत्यु भएको चार दिनपछि वल्ल कनकाई नगरपालिका–७ निवासी लोकनाथ भट्टराई(इश्वरी)को हिन्दू परम्परा अनुसार हिजो अपराह्रानबाट काजकिरिया सुरु भएको छ ।
अन्तरजातीय प्रेमसम्वन्धका कारण आत्महत्या गरेको भनिएका कनकाई नगरपालिका– ७, मन्सापुर निवासी भट्टराईको काजक्रिया नहुँदा पीडित परिवारमा थप पीडा थपिएको थियो । भट्टराई परिवारले विगत १२ वर्षदेखि पुज्दै आएका पुरोहित सोही ठाउँ निवासी रोहिणीप्रसाद गौतमले उनको काज किरिया नगरिदिएपछि मृतक भट्टराईको काजक्रिया हुन नसकेको बताइएको छ । उनको काज किरियाका लागि हिजो सोमवार दिउँसो नागरिक समाजको टोलीले भट्टराईको घरमा गएर पुरोहित यादवप्रसाद खतिवडालाई काजक्रिया गराउन आग्रह गरेपछि अपराह्र ३ वजेबाट उनको काजकिरिया थालिएको हो ।
हिजो अपराह्रबाट मृतकका ठूलोवुवा लीला भट्टराई भतिजाको काजकिरियाका लागि कोरोढिकुरो गरेर कोरामा वस्नुभएको सामाजिक अगुवा कुमारप्रसाद खरेलले बताउनुभयो । भट्टराईको काजकिरिया गराउन गंगा उप्रेती, धनपति चुडाल लगायतले पुरोहित गौतमलाई अनुरोध गरेपनि उनले आफूले नभ्याउने भन्दै उनको काज किरिया नगराएपछि अर्को पुरोहितको व्यवस्थापन गरिएको खरेलले बताउनुभयो ।
स्थानीय समाजसेवी गोपाल सिवाकोटीले भन्नुभयो ‘हामी तुरन्तै ‘मन्सापुरे समाज’ गठन गरी एउटा हिन्दुले अर्को हिन्दुलाई उपहास गरेको र अन्तरजातीयताको नाममा गरिएको विभेदको अन्त्यका लागि चाँडै हिन्दु महासंघमा समेत छलफल गरी यस्तो सामाजिक अन्योलताको अन्त्यका लागि अभियान चलाइने बताउनुभयो । भट्टराईले पुज्दै आएका पुरोहित गौतमलाई अब अन्य व्यक्तिले समेत नपुज्ने बताइएको छ ।
गत शुक्रवार भट्टराई र सोही ठाउँ निवासी अस्मिता तोलाङ्गी स्थानीय विरीङ्ग नदीको किनारामा सिसौको रुखमा एउटै डोरीले पासो लगाई आत्महत्या गरेका थिए ।
मृतकको लास पोष्टमार्टम गरेपछि वैदिक परम्पराअनुसार दाहसस्कार गर्ने समयमा पुजेका पुरेतलाई खवर गर्दा आफू नभ्याउने भन्दै पन्छिएको र अन्य पुरोहितले पनि काजक्रिया गर्न नमान्दा पीडित परिवारमा शोक माथि शोक थपिएको थियो ।
